راشد عبد القادر يكتب _كيف تكون زلنطحيا كامل الاستهبال والدجل؟

رصد _ السلطة

_‏راشد عبد القادر

_‏كيف تكون زلنطحيا كامل الاستهبال والدجل؟

‏شايف انقلاب يونيو الاستمر تلاتين سنه، قول عادى ما فيه حاجه.
‏شايف تحويل الجيش والشرطة والامن الى منظومات حزبية تابعة للحركة الإسلامية، ‏قول عادى جدا وايه يعنى لو يحتكروا المؤسسات ويبعدوا بقية ابناء الوطن.

_‏شايف احتكار قطاعات الكهرباء والبترول لابناء التنظيم.
‏قول عادى جدا ما فيها حاجه.
_‏شايف الاعتقالات والتعذيب ومداهمات البيوت انصاص الليالى حتى القتل والاخفاء القرى، اعمل نفسك لا شفت لا سمعت لا رأيت.

_‏شايف انفصال الجنوب وفقدان تلت الدولة، قول احسن ذاتو.
_‏شايف الحاصل فى دارفور وجنوب النيل الازرق و جبال النوبه شي طيران وشى جنجويد وقتل واغتصاب وحرق قرى بالكامل
‏قول عادى يستاهلوا.

_‏شايف صناعة الجنجويد وتسليحم واطلاقم للتنكيل القبلى والامنى بالآخرين ‏قول لا نهائي ما حصل.
_‏شايف ادخال فاغنر وتهريب الذهب واحتكاره وطلب الحماية من الروس.
‏قول ياخ دا موضوع قديم ما تكرروه لينا.

_‏شايف مشاركة الجيش والجنحويد كمرتزقة فى حرب اليمن وازهاق ارواح اطفال ونساء اليمن مقابل الريال السعودي والدرهم الإمارات.
‏قول اضانى طرشا اصصصلو ما سمعت.

‏_شايف الرصاص والقتل للناس فى مدن السودان وازهاق الارواح فى سبتمبر ٢٠١٣ وطوال فترة ديسمبر وتواطؤ الامن والجيش والشرطة ومنظومة الاكاذيب وشهادات الزور.
‏قول عادى الدم رخيص.

‏_شايف انه ممكن زول واحد يكون عنده مية قطعة ارض ونهب للموارد.
عادى تقول ياخ دا شيخ فلان.

_‏شفت مصادرات الصحف وتكميم الافواه واعتقالات الصحفيين؟ قول بسيييطه ما فيها حاجه.
_‏شايف النظام العام والضرب والاهانة والتحقير والجلد والحلاقة
‏قول ياخ ما مشكلة الموضوع ما خطير.

_‏شفت تاجيج الاوضاع شي جلب الادارات الاهلية شى تحريض القبائل شى قفل الميناء شى اعتصام موز وامداد بعربات الجيش والجنجويد.
‏وليس اخيرا انقلاب عديييل فى 25اكتوبر
‏قول طبيعى ياخ ما تكبرو المواضيع.

_‏شايف تصميم الواقع لاصطدام الجيش والجنحويد وحريق البلد فى حال فقدان السلطة؟
‏قول ابدا ما حصل.

_‏شايف السنتين الفيهم معاناة وعراقيل البعد الثورة.
‏مش طلعتك من قوائم الارهاب وجدولة الديون واعفت البعض وحولت البعثات الاممية الموجودة الى بعثات سياسية بعيدا عن البند السابع والما حصل فيهم مصادرات جرائد ولا اقتحامات انصاص الليالى ولا اخفاء قسرى ولا ضرب وتحقير ولا تكميم افواه ولا قتل وازهاق للارواح باجهزة الدولة وبدايات التحول الديمقراطي.

‏قول ديل اسوأ ما حصل فى تاريخ السودان
‏واتكلم عن كيف الدولة شي مهم جدا ياخ
‏_حتى لو منعتك الفرص المتساويه.
_‏حتى لو حولت اجهزة الدولة لاجهزة حزب.
_‏حتى لو اتحول جيشها لمرتزقة.
_‏حتى لو اتبنت ملايش لقتل الناس فى الاطراف والاقاليم البعيدة منك؟
‏_حتى لو صنعت النيقرز والتسعة طويلة.
‏_حتى لو قتلت الناس واغتصبتم .

‏لان الدولة حاجه ما مفترض تضمن العدالة والحرية والفرص المتساوية والامن والشفافية والنزاهة والكرامة والسيادة الوطنية.
‏بالمختصر مطلوب منك يا عزيزى ان تلقى عقلك ومخك وضميرك فى الدبليوسى.
‏ثم تضع مكانه نعلا قديما وجوربا معفنا ثم تصرخ
‏كله من القحاته.

_‏مواهيم بلهاء زلنطحية متاعيس
‏⁧‫_حرب_عبثية‬⁩