الطيب عبد الماجد يوبخ البت القالت ما بتعرف وردى _ ثقافة وطنك هى فخر
رصد _ السلطة
وجهة نظر
تابعت الفيديو بتاع البت الماعرفت وردي وقالت جمال وردي
أنا ما بهمني توجيه انتقاد للبت نفسها هذا شأن يخصها
أنا أوجه ملاحظات للحالة نفسها.
هذا النمط من البنات البتخيلو انو عدم معرفة الثقافة السودانية أو التراث السوداني هو نوع من أنواع التنميط لمبدأ البت السمحة لمن غبيه وعاشت بره كتير وما بتعرف حاجه عن السودان.
العايز أقولو للبنات ديل أو لي أهلهم بشكل خاص نو حاولو تحلو القصة دي لأنها في النهايه بتطلع شخصيات مهزوزة شويه ما واثقة في روحها وبتتخيل إنو الحضارة والثقافة الاستايل والبرستيج واللذاذه والظرافة بتزيد كل ما تبعد من حدودك الإقليمية ولغتك وهويتك،وبذلك تصبح كائن فضائي محلق، بتعرف بينوسية ووز خليفة وآخرين…..!!
اصلو ما في مشكله تعرف ديل وغيرهم في إطار مزاجك الخاص وحريتك الشخصية في السماع والاختيار وهذه حقوق خاصة لا يجوز التعدي عليها أصلًا.
بس إحساس إنو معرفة رموز الداخل وثقافته قد تثقل هذا التحليق وتخليك محلي، دا تصور كاذب وفيه من الوهم الكثير لأنو انت أصلًا جذورك وهويتك هم مصدر اعتزازك ووجودك.
والله ووالله ووالله، الجماعة الإنتو عايزين تقيفو معاهم في صفهم ديل، ما بشوفوكم إضافة ليهم، وانت مفترض ما تشوفوهم إضافة ليكم ودا المفروض، كل زول يضيق لي نفسو بس، عشان يكون في النهايه نفسو.
إنتي فاهماني …..!!
أنا senior presenter في قناه سي ان بي سي عربيه معاي زملاء مذيعات ومذيعين أعزاء من خمس دول عربية مصر ولبنان وسوريا وفلسطين والعراق، يفهمو السوداني بتاعي دا زي ما قال الكتاب وانا بفهم كلامهم دا بالنص وبقو يقرو “علوب” وبسالوني من بعض المصطلحات البتغلبهم وأنا سعيد جداً بنقل بلدي ليهم ومعرفة بلادهم من خلالهم وبيننا كل الود والتقدير والاحترام .
في شنو مالكن …؟؟
