السودانيون في إثيوبيا وازمة تجديد الجوازات
السودانيون في إثيوبيا وأزمة تجديد الجوازات
متابعات -السلطة نت
كتب هشام على
السودانيين المتواجدين بأثيوبيا سودانيين كامل الدسم ولا على كيف حكومة بورتسودان .. وتمتعهم بخدمات مرافق الدولة وأبسطها أوراقهم الثبوتية ما صدقة ولا تفضل ولا تكرم منها .. دي حقيقة مفروض تفهمها حكومة بورتسودان فرداً فرداً ..
مماطلة حكومة بورتسودان في فتح نافذة لاستخراج وتجديد الجوازات وبقية الأوراق الثبوتية بالسفارة السودانية بأديس أبابا بقت واضحة ما عاوزة ليها شرح ..
السفارة بقنصليتها وإدارة جوازاتها ، لا حول لهم ولا قوة ، العليهم سووه .. جهزوا مكان عمل وأجهزة وكمبيوترات وأنترنت وربط شبكي وكل ما يلزم عمل وإقامة فني الجوازات الكان مفروض يجي من بورتسودان من بداية أكتوبر 2024 ، وحتى الان ما جاء ، وما معروف حيجي متين ، وما معروف هل حيجي أصلاً !!
الجالية أبدت إستعدادها بالتكفل بفروقات المصروفات البتماطل فيها الخارجية والمالية .. ومئات الأسر والآف السودانيين حياتهم معطلة بسبب المماطلة دي .. أسر ما عندهم الأرقام الفلكية لتذاكر الطيران الى بورتسودان ، ولا بقدروا على تكلفة السكن والمعيشة في بورتسودان البقت أغلى من مانهاتن ، عشان يمشوا يعملوا إجراءاتهم في بورتسودان .
مرضى عالقين ما قادرين يسافروا للعلاج ، وفرص عمل ضاعت على كتيرين ، وأطفال خارج مقاعد الدراسة ، وأسر مشتته الأب في بلد والأم والأطفال عالقين في أديس أبابا بدون جوازات ، وغيره وغيره من المآسي البتقابلك يومي .. وكلهم مطحونين بمصروفات قاسية سكن ومعيشة ورسوم إقامة ، والسبب كده بس مافي أي سبب غير إنه حكومة بورتسودان لا تقيم لهم وزنا.
عندي صاحب قال في تحليله للمأساة دي :
(حكومة بورتسودان بتعتبركم يا سودانيين أديس أبابا خونة وعملاء وكفار عدييييل ، دايرنها تجدد ليكم جوازاتكم !!) ، ويبدو إنه أصاب كبد الحقيقة.
شارك هذا الموضوع :
